Qırımnıñ energetik qamaçavı Rusiye içün Qırımnıñ fiyatını köterdi, ve bu fiyat ket-kete palılaşa. Bu fikirni Milliy buhranğa qarşı gruppanıñ reberi Taras Zagorodniy Qırım.Aqiqat Radiosı efirinde bildirdi.
«Yuttıq dep tüşünmeyim, çünki darbe küçlü edi ve ileride de öyle ola. E, energetik köpür dep adlandırılğan bir qaç tel tüşürilgen. Kene sual, Qırımnıñ baquvı ne qadar paalılaşır. Qırımnıñ energetik teminlevini generatorlar yardımı ile keçirmek mümkün, amma fiyatı ne qadar olacaq, kene sual. Rusiye içün de bugünki şaraitlerde bu paradır. Misal içün, milliard tursa, şimdi fiyatı – eki milliarddır», – dey Zagorodniy.
O, SSCB dağıluvı ile qıysladı: «imperiya Moskvanıñ istegi ile degil de, para bitkeni içün dağıtıldı».
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Qamaçav iştirakçileriniñ talapları arasında – siyasiy mabüslerniñ azat etilmesi, Qırımda insan aqlarına riayet etüv ve yarımadağa halqara eyyetlerniñ kirsetilmesi.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
