Ukraina Tış işler nazirligi Rusiyeden «fevral 26 işi» iştirakçileriniñ azat etilmesi ve Qırım Rusiye akimiyeti tarafından taqibiniñ toqtatılmasını talap ete. Bu aqta Ukraina Tış siyasiy nazirliginiñ mezkür iş boyunca açılğan mahkeme toplaşuvları sebebinden aşkâr etilgen beyanatında aytıla.
«Ukraina Taş işler nazirligi Rusiye tarafından işğal etilgen Qırım Muhtar Cumhuriyetinde qırımtatar halqınıñ temsilcilerini taqip etmemek ve acele sürette qanunsız sürette apiste tutılğan Ahtem Çiygoz, Ali Asanov, Mustafa Degermenci, Arsen Yunusov, Eskender Yemirvaliyev ve Talât Yunusovnı – Rusiye Federatsiyasınıñ Ukrainağa nisbeten reyanelerini serbest bıraqmağa talap ete», – denile beyanatta.
Ukraina Tış işler nazirligi 2014 senesi fevral 26 künü Aqmescitte barışıq aktsiya iştirakçileri üzerinde «Rusiye işğalci akimiyetiniñ mahkemesi» başlanuvı sebebinden qattı narazılığını bildire. Kiyevde deyler ki, qırımtatar faalleri bu künü Vatannıñ qoruvı, Ukraina topraq bütünliginiñ saqlanuvı oğrunda küreşti.
«İşğalci akimiyetniñ tuvğan toprağını Rusiye istilâsından qoruğanlarğa nisbeten intiqamı – halqara uquq ve dünya toplulığına tsinik bir çağıruvdır», – qayd eteler nazirlikte.
Tış işler nazirliginde şunı bildireler ki, Rusiye akimiyeti tarafından qırımtatarlarnıñ taqibi, olarğa qaba ve insaniyetsiz davranış, sürgünlik, din aqqınıñ sıñırlavı, cemaat teşkilâtlarınıñ bozuluvı ve matbuat vastaları temsilcileriniñ taqibi – bu er şey «Qırımnı onıñ tamır halqı içün qorqu ve azap adasını çevirdi».
Aqmescitte «fevral 26 işi» boyunca bazarertesi künü birden eki mahkeme toplaşuvı keçe – Qırımnıñ Yuqarı Mahkemesi ve Aqmescitniñ Merkeziy rayon mahkemesinde. Yuqarı Mahkeme binası yanında onlarnen insan toplandı, amma toplaşuv salonına tek bir qaç insan kirip oldı, çoqusı, şu cümleden, mamahkümlerniñ – Mustafa Degermenci, Ali Asanov, Arsen Yunusov ve Eskender Emirvaliyevniñ tuvğanları kiremedi.
Rusiye taqiqatçıları olarnı 2014 senesi fevral 26-da Qırım parlamenti binası yanında Ukraina topraq bütünliginiñ tarafdarları ve «Rus birligi» firqasınıñ faalleri iştirak etken çoq biñli mitingde yüz bergen «kütleviy çatışmalarda» iştirak etüv ile qabaatlaylar.
Qırımda «fevral 26 işi» boyunca qabaatlanğan Talât Yunusovğa dekabr 28 künü üküm çıqarıldı.
Qırım.Aqiqatqa adliyeci Cemil Temişev aytqanı kibi, mazun fevral 26 künü kütleviy çatışmalarda iştirak etkeni içün 3,5 şartlı apis cezasına maküm etilgen.
