Qırımda «fevral 26 işi» boyunca qabaatlanğan Talât Yunusovğa dekabr 28 künü üküm çıqarıldı.
Qırım.Aqiqatqa adliyeci Cemil Temişev aytqanı kibi, mazun fevral 26 künü kütleviy çatışmalarda iştirak etkeni içün 3,5 şartlı apis cezasına maküm etilgen.
Qırım Rusiye prokuraturasında da Aqmescitniñ Merkeziy rayon mahkemesiniñ Talât Yunusovğa olğan qararı aqqında bildireler.
«Belgilengeni kibi, maküm etilgen bıltır fevral 26 künü Cumhuriyetniñ Devlet Şurası (o vaqıt Yuqarı Şura) divarları altında kütleviy çatışmalarda iştirak etken edi, işbu tertipsizlikte eki şahısqa nisbeten küç qullandı. Umumen teşkilâtçı ve iştirakçilerniñ qanunsız areketleri neticesinde eki insan elâk oldı, 79 farqlı zararlı yaralar ketirildi. Bu cinayet içün qabaatlı şahısqa 3,6 yıllıq şartlı apis cezası berile», – denile prokuratura beyanatında.
Mında şunı da qayd ettiler ki, ükümniñ qanuniyligi prokuratura tarafından ögrenile.
Aqmescitte «fevral 26 işi» boyunca bazarertesi künü birden eki mahkeme toplaşuvı keçe – Qırımnıñ Yuqarı Mahkemesi ve Aqmescitniñ Merkeziy rayon mahkemesinde. Yuqarı Mahkeme binası yanında onlarnen insan toplandı, amma toplaşuv salonına tek bir qaç insan kirip oldı, çoqusı, şu cümleden, mamahkümlerniñ – Mustafa Degermenci, Ali Asanov, Arsen Yunusov ve Eskender Emirvaliyevniñ tuvğanları kiremedi.
Rusiye taqiqatçıları olarnı 2014 senesi fevral 26-da Qırım parlamenti binası yanında Ukraina topraq bütünliginiñ tarafdarları ve «Rus birligi» firqasınıñ faalleri iştirak etken çoq biñli mitingde yüz bergen «kütleviy çatışmalarda» iştirak etüv ile qabaatlaylar.
