Dekabr 28 künü Yuqarı mahkemede «fevral 26 işi» boyunca keçirilgen toplaşuvğa kirip olamağanlar mahkeme başı adına şikâyet arizalarını yazmağa başladı. Bir on ariza endi bardır, dep bildire Qırım.Aqiqat mühbiri.
Beyanatta müellifler mahkeme reisini esnasnı alıp barğan ve insanlarnı salonğan kirsetmegen mahkemecige nisbeten tedbirlerni almağa ve ileride toplaşuvlarnıñ keçirilmesine büyükçe odalarnı ayırmağa çağırdı. Arizalarnı Qırımnıñ Yuqarı mahkemesiniñ iş ketişatı bölügine bereler. Arizanı yazğanlardan biri – Qırımtatar Milliy Meclisi reisiniñ muavini İlmi Ümerov.
Aqmescitte «fevral 26 işi» boyunca bazarertesi künü birden eki mahkeme toplaşuvı keçe – Qırımnıñ Yuqarı Mahkemesi ve Aqmescitniñ Merkeziy rayon mahkemesinde. Yuqarı Mahkeme binası yanında onlarnen insan toplandı, amma toplaşuv salonına tek bir qaç insan kirip oldı, çoqusı, şu cümleden, mamahkümlerniñ – Mustafa Degermenci, Ali Asanov, Arsen Yunusov ve Eskender Emirvaliyevniñ tuvğanları kiremedi.
Rusiye taqiqatçıları olarnı 2014 senesi fevral 26-da Qırım parlamenti binası yanında Ukraina topraq bütünliginiñ tarafdarları ve «Rus birligi» firqasınıñ faalleri iştirak etken çoq biñli mitingde yüz bergen «kütleviy çatışmalarda» iştirak etüv ile qabaatlaylar.
