Aqmescitte «fevral 26 işi» boyunca birden eki mahkeme toplaşuvı keçe – Qırım Yuqarı mahkemesi ve Aqmescit Kiyev rayon mahkemesinde, haber ete Qırım.Aqiqat.
Qırım Yuqarı mahkemesinde üçünci kere teneffüs ilân etilgen. Mında maznun skemlesinde Ahtem Çiygoz, Mustafa Degermenci, Ali Asanovdan ğayrı daa eki qırımlı otura – Arsen Yunusov ve Eskender Emirvaliyev.
Qırımnıñ Rusiye prokurorı Natalya Poklonskaya mahkeme toplaşuvına kelmedi.
Qırımtatar Milliy Meclisi reisiniñ birinci muavini Nariman Celâl aytqanı kibi, Aqmescitniñ Kiyev rayon mahkemesinde dekabr 28 künü «fevral 26 işi» boyunca keçken daa bir faali Talât Yunusovğa nisbeten de mahkeme toplaşuvı başlandı.
Rusiye taqiqatçıları Mustafa Degermenci, Ali Asanov ve Ahtem Çiygoznı 2014 senesi fevral 26-da Qırım parlamenti binası yanında Ukraina topraq bütünliginiñ tarafdarları ve «Rus birligi» firqasınıñ faalleri iştirak etken çoq biñli mitingde yüz bergen «kütleviy çatışmalarda» iştirak etüv ile qabaatlaylar.
