Link açıqlığı

Öz memleketinde akimiyet zulumı altında olğan rusiyelilerni Ukraina qorçalay bile. Bu içün olarğa siyasiy qaçaq statusını bermek kerek, dey ATR telekanalınıñ baş müdiri muavini Ayder Mujdabayev.

Bu aqta o Rusiyede Ukraina tarafdarı olğan ve Rusiye ordusında hızmet etmege istemegen genç Vlad Kоlesnikovnıñ öz-özüni öldürmesini izaatlap ayttı.

«Adiy insaniyetlik. Adiy normal insaniyetliktir. İçtimaiy icret degil, bu siyasiy sığınaqtır. Şimdi böyle insanlarnı qurtarmağa kerek. Çünki Rusiyeniñ bügünki rejimi şaraitlerinde mışıqlarnıñ başlarını kesip atqanlar devlet tarafından alğışlanıla. Olarğa er şey mümkün», – dedi Mujdabayev.

Programmanıñ diger musafiri «Çeteyel işler maydanı» teşkilâtınıñ eksperti Andrey Klimenko dey ki, Ukrainada şimdi Ukrainağa qol tutqan rusiyeliler içün ukrain vatandaşlığınıñ elde etüv ketişatını sadeleştirmek kerek. Aytqanı kibi, fondu mütenasip leyhanı işlep çıqardı – «Rusiye adilleri».

«Ğayesi Qırım işğaline, Rusiyeniñ Ukraina şarqındaki istilâsına qarşılığını bildirgen Rusiye vatandaşlarına ukrain vatandaşlığını berüv ketişatınıñ sadeleştirüvinden ibaret», – dey o

Samara vilâyeti Jigulevsk şeerinde 18 yaşında Vlad Kolesnikov öz-özüni öldürdi. Genç 2015 senesi iyün ayında derslerge «Qırımnı qaytarmaq!» yazısı ile futbolkanı kiyip kelgeninden ve Podolskte cenkke qarşı şiarnı asqanından soñ belli oldı.

Bundan soñ Vlad oquv yurtundan quvulğan edi. Rusiye mahsus hızmetleri onıñ ile meraqlandı. Vlad Kolesnikovnıñ ikâyesi belli ola, onıñ aqqında Rusiye ve ğarbiy matbuat vastaları yaza. Amma Jigulevskta Vlad tuvğanları ve yaşdaşları ile añlaşıp olamay edi.

Dekabr 25 künü Vlad Kolesnikov ilâclarıñ öldürici dozasını içti. Politsiya Radio Svoboda mühbirine aytqanı kibi, onı qurtarıp olamadılar.

XS
SM
MD
LG