Qırımtatar göñülli batalyonını teşkil etmege istegenler çetel devletlerden yardım soramadı. Bu aqta öz Facebook saifesinde Qırımtatar Milliy Meclisiniñ reisi Refat Çubarov bildirdi.
Çubarovnıñ aytqanı kibi, batalyonnıñ teşkil etilmesi şimdi çeşit ştablarda ögrenile. «Amma bugün şunı aytmaq mümkün ki, işbu arbiy bölük ne milliy, ne diniy olacaq, amma işbu faktorlar hızmetniñ teşkil etilmesi vaqtında nazarğa alınacaq; bu bölük Ukraina Silâlı quvetleri ve İçki işler nazirligi erkânında açılacaq», – qayd etti Meclis reisi.
Evel «Qırım vatandaşlıq qamaçavı» idareceisi Lenur İslâmov aytqanı kibi, «Ukraina Mudafaa nazirligi daa bir şey yapmay, Türkiye Mudafaa Nazirligi ise bizge endi yardım etmege başladı».
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Qamaçav iştirakçileriniñ talapları arasında – siyasiy mabüslerniñ azat etilmesi, Qırımda insan aqlarına riayet etüv ve yarımadağa halqara eyyetlerniñ kirsetilmesi.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
