«Fevral 26 işiniñ» birinci mahkeme toplaşuvı keçirilecek Qırım Yüksek mahkemesiniñ binası yanında dekabr 28-de elliden ziyade insan toplaştı, dep haber ete Qırım.Aqiqat.
İşbu esnasnıñ iştirakçileri Qırımtatar Milliy Meclisiniñ reis muavini Ahtem Çiygoz ve faaller Ali Asanov ve Mustafa Degermenci ola.
Mahkemege kirecek kişi çoq degil. Toplaşqanlar arasında mahkümlerniñ tuvğanları, yaqınları, tanışları. Yerli saatke köre 10-da (Kiyev saatine köre saba saat 9-da) başlaycaq mahkeme keç qala.
Qırımtatar Milliy Meclisi dekabr 28-de halqara toplulıqnı «vaqtınca işğal etilgen Qırımda insan aqlarını qorumağa» çağırdı.
Rusiye taqiqatçıları Mustafa Degermenci, Ali Asanov ve Ahtem Çiygoznı 2014 senesi fevral 26-da Qırım parlamenti binası yanında Ukraina topraq bütünliginiñ tarafdarları ve «Rus birligi» firqasınıñ faalleri iştirak etken çoq biñli mitingde yüz bergen «kütleviy çatışmalarda» iştirak etüv ile qabaatlaylar.
Aqmescit mahkemesi üçüniñ de apis cezası müddetini bir qaç kere uzatqan edi. «Fevral 26 işi» iştirakçileriniñ adliyecileri birinci instantsiya mahkemesiniñ qararına apellâtsion şikâyet bergen ediler. Faqat yalıñız bir kere Qırım Yüksek Mahkemesi Çiygoznıñ adliyecisi bergen muracaatnı qısmen qarşılap,Meclis reisi muavininiñ apiste yatuv müddetini noyabr 19 künü yerine avgust 19-na qadar qısqarttı. Lâkin birinci instantsiya mahkemesi apis müddetini tekrar noyabr 19-na, soñra ise – 2016 senesi yanvar 29-na qadar uzattı.
