Link açıqlığı

Meclis «fevral 26 işi» iştirakçileri üzerinde keçirilecek mahkeme künü Qırımda insan aqlarınıñ qoruvına çağıra


Bazarertesi künü, dekabr 28-de, Qırım Yuqarı mahkemesinde «fevral 26 işi» boyunca birinci mahkeme toplaşuvı keçirilecek. İşbu ketişatnıñ iştirakçileri – Qırımtatar Milliy Meclisi reisiniñ muavini Ahtem Çiygoz ve faaller – Ali Asanov ve Mustafa Degermenci. Qırımtatar Milliy Meclisi dünya toplulığını «vaqtınca işğal etilgen Qırımda insan aqlarını qorumağa» çağıra.

«Qırımtatar halqı – Qırımnıñ tamır halqınıñ cesür oğulları üzerinde Rusiyeniñ mahkemesi açılacaq künü halqara ve uquq qoruyıcı teşkilâtlarnı, BMT azalarınıñ ükümetlerini Rusiye işğalcileriniñ qanuniysizligini toqtatmaq ve Rusiye tarafından vaqtınca şğal etilgen Qırımda insan aqlarını qorumağa çağıramız», – dep bildire Meclisniñ matbuat hızmeti organnıñ reisi Refat Çubarovnıñ sözlerini.

Mecliste deyler ki, Ahtem Çiygoz, Ali Asanov ve Mustafa Degermenci «devletniñ qoruvı boyunca öz anayasa mecburiyetini yerine ketire ediler», dekabr 28 künü açılacaq mahkeme ise «halqara uquqnıñ qaba bozuluvıdır».

«Rusiye qanuniyetiniñ cinaiy mantığına riayet etilse, Ahtem Çiygoz, Ali Asanov ve Mustafa Degermencige belgilengen qaaatlar Ukraina topraq bütünligini qoruğan BMT azaları – dünyanıñ daa 100 devleti yolbaşçılarına bildirile bile», – denile beyanatta.

Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG