Link açıqlığı

Aksenov: fevqulâde vaziyet artıq yoq


Fevqulâde vaziyet aqibetleriniñ yoq etilmesi boyunca Qırım ştabınıñ toplaşuvı artıq er kün keçirilmeycek, dedi Qırım Rusiye başı Sergey Aksenov.

«Üçünci ve dörtünci yipi (energetik köpürniñ – QA) tüşürilmesine qadar aftada bir kere cumaaqşamı künü toplaşacaqmız. İleride bu toplaşuvlarda diger mevzular da muzakere etilecek. FV artıq yoqtır», – dedi o ştabnıñ toplaşuvında, haber ete Qırım Rusiye ükümetiniñ matbuat hızmeti.

Aksenov dey ki, bazı rayonlarda elektrik energiyasınıñ berilmesi boyunca daa sıñırlav bar.

Aytqanı kibi, ştabnıñ nevbetteki toplaşuvı 2016 senesi keçirilecek, o vaqıt onıñ şekli de belgilenir.

Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Qamaçav iştirakçileriniñ talapları arasında – siyasiy mabüslerniñ azat etilmesi, Qırımda insan aqlarına riayet etüv ve yarımadağa halqara eyyetlerniñ kirsetilmesi.

Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene.

Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG