Lviv şeer şurası Teslenko soqağı boyunca yerleşken binanı «Qırım evi»ni açacaq teşkilâtlarğa kirağa bermege razı oldı. Bu aqta Qırım.Aqiqatqa KrımSOS ğarbiy ukrain ofisiniñ reberi Alim Aliyev bildirdi.
«Üçünci kere rey berdiler, Lviv şeer şurasınıñ eski çağıruvı ile bir şey yapılmay edi, şimdi yañı çağıruv rey berdi. Bina yaqın merkeziniñ rayonında yerleşe, meydanı olduqça büyük, bir 500 metre kare, amma tamir işleri keçirilmeli», – dey Aliyev.
Yaqın zamanda masraflarğa qıymet kesilecek ve tamir işleriniñ keçirilmesine aqça toplamağa başlaycaqlar. «Qırım evi» köçip kelgenlerge hızmet etecek bir qaç teşkilâtnı birleştirecek.
«İçtimaiy, adliye mesleatlarnı, maneviy yardımnı berecekmiz. Tasil leyhaları olacaq: til kursları, çalğı aletlerinde çaluv, yır ve oyun kursları – medeniyet leyhaları azırlanılacaq. Bunıñ ile «Qırım evi»nde munaqaşa, filmlerniñ kösterilmesi keçirilecek, gumanitar yardım teşkil etilecek. Bizim içün Lvivde «Qırım evi»niñ mında kelgen ve er vaqıt yaşağan insanlar arasında bağ meydançığı olması pek müim», – dep tarif ete Alim Aliyev.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
