Qırım Rusiye başı Sergey Aksenov aytqanı kibi, biteyatqan bu yıl onıñ içün «ağır, amma can sıqıcı degil» edi.
«Bu sene ağır, amma can sıqıcı degil edi. Birilikte ciddiy manialardan keçtik ve bu vaqıt içinde yekâne, bölünmez ve er şeyge azır taqım olğanımıznı kösterdik», – yazdı o Facebookta ve Qırım «mıtlaq muvaqiyetlerge irişecegini» qayd etti.
Qırım cuma künü 2016 senesine 19,3 mlrd ruble qıtlığı ile bücetni qabul etti.
Yaqında Qırım başı Sergey Aksenov Moskvadan yarımadağa ayırılğan para yeterli olmağanı aqqında bildirgen edi.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
