Link açıqlığı

Qırım studentlerine yıl-yıldan tasilini tasdiqlamağa daa da qıyın ola – Ukraina Tasil nazirligi


Ukraina Rusiye tarafından işğal etilgen Qırımdan studentlerni qabul etmege azır, amma ukrain Tasil nazirliginde deyler ki, bunı yıl-yıldan etmege daa da qıyın ola.

Bunı Qırım.Aqiqat Radiosı efirinde Tasil ve ilim naziriniñ birinci muavini İnna Sovsun bildirdi.

Nazir muavini aytqanı kibi, Qırım studentleri Rusiye programması boyunca oquy ve qıtaiy Ukraina aliy oquv yurtlarına kelgende, bir sıra fenlerni tapşırmağa mecbur.

«Yuridik ceetten pek qıyın, çünki olar (studentler – QA) bir buçuq yıl diger şaraitlerde, diger programmalar boyunca oqudı ve ilâhre», – dedi Sovsun.

Sözlerine köre, qırımlılar ukrain aliy oquv yurtuna keçkende, aliy oquv yurtu olarğa fenlerni ekstern şeklinde tapşırmağa imkân bere. Böylece, Qırım studentleri bir oquv seneni qaçırmaylar.

«Çünki, olar, misal içün, işğal vaqtında üçünci kursta olsa, şimdi dörtünci kursta oquvını devam ete bileler», – dey o.

Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG