Ukraina Yuqarı Radası gece toplaşuv keçirip, Kiyev saatine köre saat 04:05 2016 senesi devlet bücetini qabul etti. 263 deputat bunıñnen bağlı qanun leyhasına qoltuttı. «Oppozitsionnıy blok» («Muhalifet bloku»), «Batkivşçına» («Vatan») rey bermediler, dep haber ete Radio Svoboda.
Bergi kodeksinde qabul etilgen deñişmelerni köz ögüne alıp, leyhanı bir qaç kere Nazirler şurasınıñ qapalı toplaşuvında teşkerdiler ve bücet komitetiniñ toplaşuvında tekliflerni seslendirdiler.
Deputatlar alğan vesiqada kâr ve masraf köstergiçleri bar – Ukraina 595 milliard grivnadan ziyade alacaq. Maliye nazirliginiñ tahminlerine köre, masraflar 667 milliard 733 million grivnanı teşkil ete.
Kelecek sene yanvar 1-den itibaren ukrainlerniñ asğariy maaşı 1378 grivna, mayıs 1-den – 1450 grivna, dekabr 1-den ise – 1550 grivna olacaq.
«Soñki afta devamında Yuqarı Rada deputatları kirsetken aman-aman yigirmi deñişmeni köz ögüne aldıq. 2016 senesi memleket bücetiniñ leyhasında 2015 senesi VVP 4,1% seviyesine nisbeten VVP 3,7% seviyesinde eksiklik belgilene», – dep ayttı maliye naziri Natalya Yaresko.
Halqara para fondunıñ nevbetteki para tranşını almaq içün devlet büceti leyhasını qabul etmek ğayet müimdir.
Dekabr 24-te saba deputatlar 2016 senesi devlet büceti qabul etilgenine qadar çalışmağa qarar aldılar. Bergi kodeksiniñ deñişmeleri de qabul etildi.
