Link açıqlığı

Qırımda internette «ekstremizm çağıruvları» sebebinden 19 yaşında gençni mahkeme etecekler


Qırımnıñ Rusiye mahkemesi Aqmescit rayon mahkemesine Aqmescit rayonı 19 yaşında sakinine nisbeten cinaiy işniñ açılması boyunca malümatnı yolladı. Prokuraturanıñ malümatına köre, genç Rusiye Federatsiyasınıñ CK 280 maddesi 2-nci qısmına köre cinayetniñ etilmesinde qabaatlana – «İnternet» haber-telekommunikatsion ağınıñ qullanuvı ile keçirilgen ekstremist faaliyetine çağıruv».

«Qabaatlanğan şahıs «VKontakte» içtimaiy ağında «Qırımtatar Muhtar Milletçileri» gruppasında insan ve vatandaşlarnıñ milliy mensüpligi ile bağlı aqları, serbestligi ve menfaatınıñ bozuluvına çağıruvı ile bağlı metinni aşkâr etti», – denile beyanatta.

Maddege köre 5 yıllıq apis cezası ya da mecburiy işler ceza olaraq belgilene.

Uquq qoruyıcılar bildirgeni kibi, Qırımnıñ Rusiye Federatsiyasına ait olğanını red etken er angi malümat yarımada akimiyeti tarafından Rusiye topraq bütünliginiñ bozuluvı olaraq tanıla ve cinaiy cezanı nazarda tuta.

Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG