Qırım Yuqarı mahkemesi Qırımtatar Milliy Meclisi reisiniñ muavini Ahtem Çiygoznıñ şikâyet arizasını qabul etmedi ve 2014 senesi fevral 26 künü Qırım parlamenti yanında kütleviy nizamsızlıq ile bağlı iş malümatı ile tanışuv müdetiniñ sıñırlavı aqqında mahkeme qararını lâğu etmedi.
Qırım Yuqarı mahkemesiniñ bu qararı dekabr 24 künü qabul etildi, dep haber ete Qırım.Aqiqat.
Toplaşuv devamında advokat Aleksandr Lesovoy aytqanı kibi, 24 cılttan ibaret olğan iş malümatı ile tanış oluv müddeti sebepsiz sıñırlanıldı.
«İmayeciler işniñ aselet uzattırılması olaraq tanılacaq areketlerni etmegenler. Mahkeme işniñ daa 14 cıltı ögrenilmegenini nazarğa almay», – denile şikâyet arizasında.
Bundan da ğayrı, adliyeciniñ malümatına köre, «fevral 26 işi» boyunca 47 gb video toplanğan. «Bir gb bir 4 saat baqıla, 5 kün (taqiqatqa berilgen – QA) malümatnıñ ögrenilmesine yeterli degil», – dey Lesovoy.
Onıñ fikrine köre, mahkeme Çiygoznıñ 2016 senesi yanvar 29-na qadar apiste qaldırılmasını bilip, iş malümatı ile tanışuv müddetini uzata bile edi.
Çiygoznıñ özü mahkeme toplaşuvı vaqtında aytqanı kibi, 10 kün içinde 24 cılttan tek 10 cıltnı ögrendi.
Çiygoznıñ doğmuşları bildirgenine köre, «fevral 26 işi» boyunca birinci mahkeme toplaşuvı 2015 senesi dekabr 28-de keçirilecek. Qırım prokurorı Natalya Poklonskaya mezkür iş boyunca devlet qabaatına qol tutacağını bildirgen edi.
Qırımtatar Milliy Meclisi reisiniñ muavini Ahtem Çiygoznı Qırım parlamenti yanında 2014 senesi fevral 26-da keçirilgen kütleviy tertipsizliklerni meydanğa ketirmesi boyunca qabaatlap, 2015 senesi yanvar 29-da yaqaladılar.
2015 senesi noyabr 30 künü Qırımnıñ Yuqarı mahkemesiniñ Çiygoznı 2016 senesi yanvar 29-na qadar apiste bulunması aqta qararını lâğu etmedi.
