Dekabr 24 künü sabası Seyitler rayonı Çaya (Jelâbovka) köyünde musulman ibadet evini ateşke bermege ıntıldılar, dep bildire Qırım Musulmanlarınıñ Diniy İdaresiniñ matbuat hızmeti.
Qırım Müftiyliginiñ malümatına köre, bunı camige saba namazına kirgen Sudaq sakinleri taptı. Erkek camiden çıqqan tumannı kördi.
«Olğan malümatqa köre, cinayetçi camige pencereni qırıp kirdi. İbadet odasında cinayetçi islâm edebiyatı ve muqaddes Quran kitabınıñ nushaları ile dolapnı yaqtı. Çastımızğa, ateş binağa yayılmadı, neticede odanıñ tek bir köşesi yandı», – denile beyanatta.
Seyitler rayonınıñ musulman diniy cemiyetleriniñ reisi Rustem Temirov aytqanı kibi, Çaya köyündeki camini endi bundan da evel ateşke bermege tırışqan ediler.
«Yedi-sekiz yıl evelsi de camini yaqmağa tışırqan ediler. Köyniñ çetinde yerleşe, mında sebze çarşısı da yanında bar. Köy küçük, cuma namazına 25-30 mümin kele, başqa künleri bina qapatıla, anahtarnıñ ne yerde olğanını tek musulmanlar bile. Qaravul ve video nezareti sisteması yoq», – dey Rustem Temirov.
QMDİ bildirgeni kibi, vaqia yerine uquq qoruyıcı organları, Fevqulâde işler nazirligi, Seyitler rayonı akimiyetiniñ temsilcileri keldi.
«Köy musulmanları yüz bergen vaqiadan sebep qasevet çeke ve bunı tarik olaraq tanıy, çünki er keske belli ki, tünevin musulman dünyası Muhammed peyğamberniñ doğğan kününi qayd etken edi», – deyler Müftiylikte.
Caminiñ ateşke berüvi aqqında malümat Qırımda Rusiye İçki işler nazirliginiñ resmiy saytında şimdilik daa yoqtır
