Qırım ve Aqyarğa bağışlanğan hatıra aqçası dekabr 23 künü çıqarıldı, dep bildire Rusiye Federatsiyasınıñ Merkeziy bankı. Beyanatta qayd etilgeni kibi, yañı aqça 100 ruble birleminde çıqtı. Bir tarafı Aqyarğa, başqаsı – Qırımğa bağışlanğan.
Qırımğa bağışlanğan tarafında «Qarılğaç yuvası» isarı tasfir etilgen. Ekinci tarafından – Aqyar körfezinde batqan gemilerge abide, Ayvazovskiy resiminiñ parçası kösterilgen.
«Qarılğaçlar yuvası» resimi altında Rusiye Bankı saytınıñ saifesine QR-kod ile bağlantı yazılğan, mında hatıra aqçası aqqında tarihiy malümatnı tapmaq mümkün», – denile beyanatta.
Hatıra aqçası cemi 20 million nushada çıqtı.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
