Rusiye Federatsiyası Qırımda «sovet añlamında» turizmni inkişaf etecek. Bu kibi fikirni Qırım.Aqiqat Radiosında jurnalist, «Levıy bereg» neşirinde «İqtisadiyat» bölüginiñ muarriri Andrey Yanitskiy bildirdi.
Jurnalistniñ fikrine köre, Rusiye Federatsiyası «Qırımdan ekinci Soçi etecek», amma Rusiye ükümeti yarımadada arbiy saanıñ inkişafı aqqında unutmayıp, turistik Qırımnı inkişaf etecek.
«Rusiye Qırımda arbiy bazanı inkişaf etecek. Rusiye Qırımda turizmni inkişaf etecek, kiyik soyunı degil, sovet añlamındaki turizmni, insanlar anda yollanmalar boyunca kelecek. Qırım – rusiyeliler içün Türkiye ve Mısır yerini alacaq. Çünki anda uçmağa endi olmay, Qırımğa ise yazda mümkün», – dey Yanitskiy.
O şunı da qoştı ki, Rusiye ükümetine Qırım «sakral noqtaiy nazarından» müim, teşviqat maqsadında.
«Belki de, anda ortodoks acılığı inkişaf eter… Qalğanı, menimce, Moskvanı raatsızlatmay. E, nefaqacılarğa, uquq qoruyıcılarğa aqça berilecek, çünki olar rejimniñ tiremesidir. Yaşlarğa kelsek, fikrime köre, yaşlarnıñ Qırımda kelecegi yoqtır. Şunıñ içün gençler Qırımdan kete», – dey Yanitskiy.
Andrey Yanitskiy şunı da qayd etti ki, şimdi Qırımda esli başlı insanlarnıñ sayısı arta. Jurnalist yarımadanı «balaban qartlar evi» ile qıyasladı.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
