Qıırm ile memuriy sıñırnıñ qamaçavı boyunca aktsiya iştirakçileri blokpostlarda vatandaş ve naqliyanıñ teşkerüvini artıq keçirmeycekleri aqqında bildire. Bu aqta dekabr 22 künü aktsiya iştirakçileriniñ Facebooktaki saifesinde bildirile.
«QVQ (Qırımnıñ «vatandaşlıq qamaçavı» – QA) blokpostlarından keçken yerli sakinler ve vatandaşlarnıñ ricası olğanı içün, endi faaller ile birlikte yolcu ve naqliyatnıñ teşkerüvini Devlet Patrul hızmeti, politsiya, «Herson» batalyonınıñ temsilcileri keçirecek», – denile beyanatta.
Aktsiya ştabında dekabr 17 künü qabul etilgen Ukraina Nazirler kabinetiniñ Qırım ile ticaretniñ sıñırlanması aqqında qararına esaslandılar.
Herson vilâyet devlet memuriyetiniñ saytında aktsiya ştabınıñ bildirüvi aqqında malümat yoq.
Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Qamaçav iştirakçileriniñ talapları arasında – siyasiy mabüslerniñ azat etilmesi, Qırımda insan aqlarına riayet etüv ve yarımadağa halqara eyyetlerniñ kirsetilmesi.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
