Qırım Rusiye akimiyeti tarafından qapatılğan ve Qırım federal universiteti terkibine qoşulğan Vernadskiy adına Tavriya Milliy Universiteti qıtaiy Ukrainada işine devam etecek, dep bildirdi ukrain aliy oquv yurtunıñ rektorı vazifesine tayinlengen Vladimir Kazarin.
«Noyabr ayında Vernadskiy adına Tavriya Milliy Universitetiniñ işine qıtaiy Ukrainada devam etmesi aqqında qarar çıqtı, noyabr 19 künü men bu universitetniñ rektorı vazifesine tayinlendim», – tarif etti o Qırım.Aqiqatqa.
Şimdi iş gruppası teşkiliy meselelerni al ete, ğayrıdan açılğan aliy oquv yurtunı Şevçenko adına Kiyev milliy universiteti idare etecek – onıñ qırmızı binasında Qırımdan kelgen ocalar yerleşti. Kiyev sakinleri mesken ile yardım ettiler.
«Şimdi ğayrıdan qayd etüv ketişatını bitiremiz. Baarniñ soñunace – yaznıñ başına qadar mında, Kiyevde, TMUğa birinci qabul etüvni keçirmege planlaştıramız», – qayd etti Vladimir Kazarin.
Ukraina Tasil ve ilim nazirligi köçip kelgen universitetniñ yerleşüvi boyunca bir qaç variantnı teklif etti ve bir – bir buçuq ay devamında bu meseleni «qapatırmız», dedi rektor.
Onıñ aytqanı kibi, ocalar terkibi ile problemler olmaycaq, çünki «Qırım işdeşlerimniñ çoqusı qıtaiy Ukrainağa çoqtan köçip kelgenler» ve Qırımda qalğan bir çoqusınıñ köçip kelmesine azırmız. Vladimir Kazarin ukrain aliy oquv yurtunda çalışmağa istegen ocalarnıñ sayısı büyük olğanını qayd etti.
«Tavriya universitetiniñ Ukrainada olmasını isteymiz ve şunıñ içün Stanislavskiyniñ aytqanına riayet etecekmiz: «MHAT aktörlarnı işke almay, olarnı kollektsionirley», – dedi Vladimir Kazarin.
Kiyevde TMU şimdi gumanitar yönelişni inkişaf etecek – birinciden, Qırım halqlarınıñ til, edebiyat, tarihı, «quvetli» şarqşınaslıq fakulteti de ğayrıdan açılacaq.
«Ruhiyatçı, adliyeci ve coğrafiyacılar ile çalışacaqmız», – dedi Kazarin.
Sentâbr ortasında Vladimir Kazarin Pragada keçirilgen «Forum 2000» konferentsiyasında şimdiki Qırım tasilini tenqit etti, bundan soñ Qırım Rusiye akimiyetinde professornıñ Vernadskiy adına Qırım federal universitetiniñ Tavriya akademiyasınıñ rus ve ecnebiy edebiyatı kafedrasınıñ reberi vazifesinden boşatılması aqqında laf yürsetilmege başlandı.
