Qırımnıñ Rusiye başı Sergey Aksenov dey ki, onıñ ükümeti yarımadada şimdiki şaraitlerde vaziyetni idare ete, amma «Rusiye Federatsiyası ve prezidentiniñ yardımı olmadan».
«Şimdiki vaziyette, çoq şükür, olğanını saqlap oldıq», – dedi o jurnalistlerge Aqmescitte.
Qırımğa nisbetenhalqara sanktsiyalarnıñolğanı aqqında aytqanda, Aksenov yarımada böylece Rusiyeniñ «hususiy subyekti» olğanını qayd etti.
«Biz öz vazifelerimizge professional yanaşamız, ya yoq – kibi laflarnı aytqan bazı erbaplarğa böyle deyim: er bir zenaatdaşıma mında kelip, vaziyetni ögrenmege imkân berem. Vali-zenaatdaşlarım bizim mında «kamikadze» olğanımıznı qayd eteler, çünki aqıl-ferasetli insan iç bir vaqıt buña razı olmaz edi», – dey o.
Federal matbuat vastaları Rusiye ükümeti Qırım yolbaşçılığınıñ işinden ve Aksenovnıñ yarımadağa ayırılğan para yetişmegeni aqqında beyanatından memnün olmağanı ile bağlı beyanatlarnı aşkâr etti. Rusiye baş nazir muavini Dmitriy Kozak dey ki, şimdi cumhuriyetniñ birinci şahıslarından bir kimse istifağa çıqmaycaq, amma Qırım memurlarınıñ tarafından maliye vastaları nege masraf etilgeni ögrenilecek.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
