Ukraina prezidenti Petro Poroşenko İsrailde devlet ziyareti çerçivesinde zenaatdaşı Reuven Rivlin ile muzakerelerni keçirdi.
«Subetdeşler Minsk añlaşmalarına tam riayet etilmesiniñ zaruriyetini qayd etti ve Qırımnıñ acele sürette işğalden azat etilmesiniñ ve yarımadada ukrain mustaqilliginiñ tiklenilmesiniñ tarafdarları olğanını bildirdiler», – dep bildire ukrain devletiniñ matbuat hızmeti.
Petro Poroşenko İsrail prezidentine «Donbass vaziyetiniñ qorqunçlı inkişafı aqqında» tarif etti.
«Ukraina ve İsrail al-azırda ciddiy problemlerge rastkele. Olardan esası: memleketni tış telükeden qorçalamaqtır», – qayd etti Ukraina prezidenti.
Matbuat hızmetinde bildirilgeni kibi, Poroşenko İsrail vatandaşlarınıñ vatanperverligi ve cesürligi ile bağlı ayretini bildirdi.
«Er kün mustaqilligi ve topraq bütünlgi oğrunda küreşken memleketniñ prezidenti olaraq keldim», – dedi o.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
