Qırımtatar Milliy Meclisinde Qırımda Canköy sakini Enver Kroşnıñ yaqalanuvı aqqında bildireler, FSB hadimleri onı elektrik ceryanı ile qıynalğanlar.
Meclis matbuat hızmeti bildirgeni kibi, 24 yaşında Enver Kroşnı dekabr 16 künü yaqaladılar ve Canköy politsiyasınıñ rayon bölügine ketirip, FSB hadimlerine teslim ettiler, olar ondan işbirlikke yazı şeklinde musaadeni almağa tırışqanlar.
«Beklenilgen neticelerni elde etip olamağan hadimler Enver Kroşnı elektrik ceryanı ile qıynadılar. Dekabr 17 künü sabası onı azat etti ve böyle dediler: «Apayıñ, bala, tuvğanlarıñ bar… bunı tüşüñ, teklifimiz aqqında tüşüñ», – dep yazalar beyanatta, qırımtatarlarnıñ milliy lideri Mustafa Cemilevniñ malümatına esaslanıp.
FSB hadimleriniñ böyle azap vastası ile neni ögrenmege tırışqanları belgisizdir.
Qırım FSB idaresi ve Qırım uquq qoruyıcı organlarınıñ bu aqta resmiy izaatları şimdilik yoq.
Dekabr 15 künü Keriçte eki adam ğayıp oldı – Ruslan Ganiyev ve Arlen Terehov. Olarnıñ taqdiri aqqında alâ daa malümat yoq.
