Link açıqlığı

Dekabr 16 künü Qırımda işiniñ toqtatılması aqqında ilân etken ATR media-holdinginiñ «15 minut» haber saytı Kiyevden işine devam etti. Bu aqta Qırım.Aqiqatqa ATR telekanalı baş müdiriniñ muavini Ayder Mujdabayev bildirdi.

«Saytta Kiyev jurnalistleri çalışa. Hadimlerniñ qıdırıluvı aqqında ilân berdik. Saytnıñ işi aynı olacaq: Qırım aqqında ve Qırım ile qırımtatarlar içün akutal olğan mevzular aqqında yazacaq», – dedi o.

Ayder Mujdabayevniñ aytqanı kibi, media-holdingde Qırımda qalğan ATR hadimleri «Kiyevge kelip, şirketimiz ve saytımızda çalışacağına» ümüt besleyler.

Media-holdingniñ saibi Lenur İslâmov «15 minut» saytında aytqanı kibi: «15 minut» ve «Lâle» bala telekanalı – ATR serbest media-holdinginiñ levhaları. ATRniñ qıtağa mecburiy köçip kelmesinden soñ bu levhalarnı Qırımda, tutmağa çarem olğanına qadar, tuttım».

«Qırımda bütün milliy media leyhalarımıznıñ saf ölümi böyle yaşayışqa köre daa da eyidir!» – dedi o.

Qırımda ATR qırımtatar telekanalı ile bir media-holdingge kirgen «15 minut» haber saytınıñ hadimleri ve «Lâle» bala telekanalı muarririyeti yarımadada işiniñ toqtatılması aqqında bildirdiler.

Aytılğanı kibi, soñ vaqıtları sayt ATR qırımtatar telekanalınıñ sabıq baş müdiri Elzara İslâmova ve onıñ sabıq muavini Lilâ Bucurova meydanğa ketirgen «QaraDeniz Production» studiyasınıñ terkibinde çalışa edi.

«15 minut» saytınıñ hadimleri «yap-yañı internet-leyhasınıñ meydanğa ketirilmesi üzerinde çalışmağa» niyetini bildirdi.

ATR media-holdinginiñ saibi Lenur İslâmov Qırım.Aqiqatqa aytqanı kibi, «15 minut» saytını qıtaiy Ukrainağa avuştırmağa ve bu maqsadı ile Qırımdan hadimlerniñ köçip kelmesini teşkil etmege planlaştıra. İslâmov şunı qayd etti ki, saytnıñ hadimlerinden bar qısmı yarımadanı terk etmege istemey.

2015 senesi aprel 1-den dünyada yekâne ATR qırımtatar telekanalı, «Lâle» bala telekanalı, «Meydan» radiosı Roskomnadzor litsenziyasını alalmayıp, işğal etilgen Qırımda yayınlavını toqtatmaq mecbur oldı. İyün 17-den ATR ve «Lâle» Kiyevden yayınlavına devam etti, «Meydan» internette çalışmağa başladı.

Lenur İslâmov Qrımınıñ Rusiye akimiyeti takbih etken Qırım vatandaşlıq qamaçavınıñ teşebbüsçisi ola, yerli prokuratura oña qarşı cinaiy işni açtı. Mında Lenur İslâmovnıñ mülkiyetiniñ apis etilmesi aqqında da bildirgen ediler.

XS
SM
MD
LG