Qırımtatarlarnıñ milliy lideri, Ukraina Yuqarı Radasınıñ deputatı Mustafa Cemilev dey ki, qırımtatarlar şimdi sürgünlik yerlerinden – Özbekistan ve Tacikistandan yarımadağa qaytmağa aşıqmay. Onıñ sözlerine köre, qaytmağa istegen qırımtatar aileleri içün yarımadada şimdi zaruriy şaraitler yaratılmay.
Bu aqta o Qırım.Aqiqat Radiosınıñ saba efirinde bildirdi.
«İşğalniñ başlanuvından ve bugünge qadar, bilgenime köre, Qırımğa ya 87 aile, ya insan kelgen edi. Kimsege Qırımda yerleşmege izin bermediler. Çünki olarda (Qırımda – Q.A) kvota bitken eken. Böyle vaziyet ve şunıñ içün qırımtatarlar şimdi işğal etilgen Qırımğa qaytmağa ister dep tüşünmez edim», – dey o.
Mustafa Cemilev bu insanlar içün Herson vilâyetinde şaraitlerni yaratmağa teklif etti.ü
Qırımnıñ Rusiye akimiyetine yaqın olğan ekspertler bildirgeni kibi, qırımtatar halqınıñ tarihiy vatanına adveti soñuna yetkendir. Olarnıñ fikrine köre, Qırımda tamır halqınıñ içtimaiy-iqtisadiy inkişafı içün bütün zaruriy şarait bardır. Qırımtatar memurları ve Meclis temsilcileri bunıñ ile razı degil. Hatırlatqanları kibi, yarımada tışında yaşağan qırımtatarlarnıñ sayısı on biñlerge yete. Amma Vatanğa qaytqanlar pek çekişedir.
2001 senesi yapılğan teşkerüvge köre, Qırımda sürgünlik yerlerinden qaytqan bir 250 biñ qırımtatarı yaşay.
