Qırımğa Artur Mikvabiya – Gürcistannıñ separatist regionı olğan Abhaziyanıñ baş naziri keldi. «Aqmescit» ava limanında onı Qırımnıñ Rusiye başı Sergey Aksenov qarşıladı.
«Artur Mikvabiya Qırım federal okrugında Rusiye Federatsiyasınıñ vekâletli temsilcisi Oleg Belaventsev, Sergey Aksenov, iqtisadiyat, sanaiy siyaset, naqliyat nazirleri ile körüşecek ola», – dep bildire Qırım Rusiye ükümetiniñ matbuat hızmeti.
Artur Mikvabiya Yaltağa da baracaq ola.
2008 senesi avgust 8-ne keçer gecesi Tbilisiniñ öz başına ilân etilgen Cenübiy Оsetiya ve Abhaziya cumhuriyetleri üzerinde nezaretini tiklemek ıntıluvından soñ Gürcistanğa Rusiye küçleri kirdi.5 künlük cenkniñ neticesinde Rusiye Gürcistannıñ eki regionı – Abhaziya ve Cenübiy Оsetiyanıñ mustaqilligini tanıdı ve işbu territoriyalarda öz arbiy bazalarına qoşma ordu ve silâlandıruvını kirsetti. Dünya devletleri – Rusiye, Venesuela, Nikaragua ve Naurudan ğayrı – bu territoriyalarnı Rusiye tarafından işğal etilgen Gürcistan toprağı olaraq tanıy.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
