Türkiye menfaatı qırımtatar halqı yetekçileri içün müim olacaqtır, çünki anda (Türkiyede – QA) qırımtatarlarnıñ sayısı Qırımda olğanından da çoqtır, dedi Ukraina halq deputatı, qırımtatarlarnıñ lideri Mustafa Cemilev Qırım.Aqiqat Radiosınıñ efirinde.
«Men, qırımtatarı olıp, elbette ki, Türkiye taqdirine lâqayt degilim, çünki Türkiyede, Qırımğa köre, yaşağan qırımtatarlarnıñ sayısı 10 qat büyüktir. Şunıñ içün taqdirimiz tarihiy ceetten bağlıdır, tabiiy ki, Türkiye menfaatını qoruycam. Em de, şu sırada, memleketimniñ menfaatını da», – dedi o.
Rusiye tarafını tutqan siyasetçiler Refat Çubarov ve Mustafa Cemilevni Türkiye tarafdarları olaraq adladı. Şu sırada, Rusiye şarqşınası, Rusiyeniñ Yaqın Şarq institutınıñ prezidenti Yevgeniy Satanovskiy Rusiye matbuat vastalarında Mustafa Cemilevni «islâmist» olaraq adladı.
Qırımtatarlarnıñ yetekçileri dekabr 16-17 künleri memleketniñ birinci şahısları ile körüşmek içün Türkiye Cumhuriyetine iş ziyareti çerçivesinde kelgenler. Dekabr 16 künü Cemilev ve Çubarov Türkiye prezidenti Recep Tayip Erdoğan, baş naziri Ahmet Davuotğlu ve Tış işler naziri Mevlüt Çavuşoğlu ile körüştiler.
