Vaqtınca işğal etilgen Qırım ve Donbasstan Ukrainanıñ diger regionlarına 1 million 900 biñ 836 insan köçip keldi, dep bildire Fevqulâde vaziyet boyunca Ukraina devlet hızmetiniñ matbuat hızmeti.
Bildirilgeni kibi, Donetsk ve Lugansk vilâyetleriden 988 biñ 255 insan, Qırım Muhtar Cumhuriyeti ve Aqyardan – 21 biñ 611 insan köçip keldi.
KrımSOS göñülli cemaat teşkilâtınıñ malümatına köre, Qırım Rusiye tarafından 2014 senesi işğal etilgeninden soñ, yarımadanı 45-50 insan terk etti. Mecliste deyler ki, olardan yarısı – qırımtatarlarıdır.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
