Ankara Ukrainağa informatsion ceetinde yardım etmege azır, şu cümleden ATR telekanalına tehnikiy destekni kösterip, dedi qırımtatarlarnıñ milliy lideri, Ukraina Yuqarı Radasınıñ deputatı Mustafa Cemilev.
Bu aqta o, Türkiye yetekçileri ile körüşüvi neticeleri aqqında tarif etip, Qırım.Aqiqat Radiosınıñ efirinde bildirdi.
Onıñ sözlerine köre, qırımtatar telekanalınıñ işğalden soñ vaziyeti Türkiye baş naziri ve tış işler naziri – Ahmet Davutoğlu ve Mevlüt Çavuşoğlu ile muzakere etildi.
«Telekanal saibi Lenur İslâmovnıñ bütün mülkiyeti (Qırımda – QA) zapt etildi. Telekanal ağır vaziyetke oğradı. Qırım halqı telekanalğа yardım köstermek içün birer kapik topladı. Ukrainanıñ da şimdiki vaziyeti büyük yardım köstermege imkân bermey. Şunıñ içün nasıldır bir tehnikiy yardımnıñ türklerniñ tarafından kösterilmesi aqta laf yürütildi. Olar dediler: «İtiraz yoq, bu meseleni ögrenirmiz», – dedi Cemilev.
2015 senesi aprel 1-den dünyada yekâne ATR qırımtatar telekanalı, «Lâle» bala telekanalı, «Meydan» radiosı Roskomnadzor litsenziyasını alalmayıp, işğal etilgen Qırımda yayınlavını toqtatmaq mecbur oldı. İyün 17-den ATR ve «Lâle» Kiyevden yayınlavına devam etti, «Meydan» internette çalışmağa başladı.
Lenur İslâmov Qrımınıñ Rusiye akimiyeti takbih etken Qırım vatandaşlıq qamaçavınıñ teşebbüsçisi ola, yerli prokuratura oña qarşı cinaiy işni açtı. Mında Lenur İslâmovnıñ mülkiyetiniñ apis etilmesi aqqında da bildirgen ediler.
