Qırımtatarlarnıñ milliy yetekçisi, Ukraina Yuqarı Radasınıñ deputatı Mustafa Cemilev dey ki, qırımtatarlar Rusiye tarafından işğal etilgen Qırım tışına çıqmağa devam eteler. Qırımtatarlarnıñ yetekçileri mecburiy icret Qırımğa yaqın olğan Herson vilâyeti ile sınırlanmasını isteyler.
Bu aqta o dekabr 21 künü Qırım.Aqiqat Radiosınıñ efirinde bildirdi.
Cemilevniñ sözlerine köre, qırımtatarlarnıñ çoqusı, yarımadanı terk etip, Ukrainanıñ ğarbiy regionlarına kete.
«Olarnıñ milliy mensüpligi saqlanıp qalmasını ister edik, til müitiniñ olmasını, Qırımğa yaqın, Herson vilâyetinde toplanılmasını ister edik. Qaytmağa qolay olsun dep, em de Herson vilâyetinde ukrain müitiniñ olmasını isteymiz. Anda, söz sırası, «vatniklerniñ» sayısı büyük. Atta memurlardan bazıları özlerinde «eki başlı çernobıl tavuqlarını tuta», – dey Cemilev.
KrımSOS göñülli cemaat teşkilâtınıñ malümatına köre, Qırım Rusiye tarafından 2014 senesi işğal etilgeninden soñ, yarımadanı 45-50 insan terk etti. Mecliste deyler ki, olardan yarısı – qırımtatarlarıdır.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
