Qırımda dekabr 15 künü Keriçte ğayıp olğan 44 yaşında Arlen Terehov ve 42 yaşında Ruslan Ganiyevniñ taqdiri alâ daa belgisiz.
«İzsiz ve taqiqatsız: Terehov ve Ganiyevniñ ğayıp oluvında «Suriye izi» Qırım.Aqiqatnıñ maqalesinde aytılğanı kibi, İnsan aqları boyunca Qırım kontakt gruppasınıñ idarecisi Abdureşit Cepparov ğayıp olğan insanlarnıñ tuvğanları ve tanışları ile körüşti. Subet devamında vaqia tafsilâtları ögrenildi, şu cümleden, ğayıp olğan insanlarnıñ göñülli sürette bir yerge ketmesi mümkün olmağanı qayd etildi.
Cepparovnıñ sözlerine köre, taqiqat organları Terehov ve Ganiyev Yaqın Şarqqa ketmesinde israr ete.
Ruslan Ganiyev dekabr 15 künü Keriç civarında yaşağan anasına çıqıp, yol boyu ğayıp oldı. Evinde pasportları saqlıdır – ukrain ve çetel pasportı, şunıñ içün Qırım Rusiye uquq qoruyıcılarınıñ onıñ Yaqın şarqqa ketmesi aqqında aytqanı aqiqatqa uymay.
Tuvğaları Arlen ve Ruslannıñ hırsızlanuvını tüşüneler.
Qırım uquq qoruyıcı organlarınıñ saytlarında Keriç sakinleriniñ ğayıp oluvı aqqında resmiy malümat yoq.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
