Link açıqlığı

«Qırım» teşkilâtı» qamaçav yetekçileri üzerinde «halq mahkeme»siniñ başlanuvını ilân etti


Rusiye tarafdarı «Qırım» qırımtatar teşkilâtı «Qırım vatandaşlıq qamaçavı» teşebbüsçileri Mustafa Cemilev, Refat Çubarov, Lenur İslâmov üzerinde «halq mahkemesi»niñ başlanuvını ilân etti. Bu qarar dekabr 19 künü «Qırım» teşkilâtınıñ ekinci qurultayında qabul etildi, dep bildire TASS.

«Qırım aqibetleriniñ ögrenüvi ve olarnıñ halqqa qarşı faaliyetini taqiq etmek ve oña qıymet kesmek içün iş gruppasını teşkil etmek», – denile qurultaynıñ beyannamesinde.

«Qırım» cemaat teşkilâtınıñ reisi – Qırım Devlet şurası reisiniñ muavini Remzi İlyasovdır.

Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Qamaçav iştirakçileriniñ talapları arasında – siyasiy mabüslerniñ azat etilmesi, Qırımda insan aqlarına riayet etüv ve yarımadağa halqara eyyetlerniñ kirsetilmesi.

Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene.

Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG