Türkiye Cumhuriyetinde şimdi Rusiye Federatsiyası ve Qırımda üküm sürgen «Türkiyege qarşı keyfni» «delilik» olaraq tanıylar, dedi Qırım.Aqiqatqa Ukraina prezidentiniñ qırımtatar halqınıñ işlerinden vekâletlisi Mustafa Cemilev, qırımtatar yetekçileriniñ Türkiyedeki iş ziyaretiniñ neticelerini izaatlap.
Aytqanı kibi, bu memlekette Türkiye iş adamlarınıñ quvulğanı ve Türkiyede oquğan insanlarnıñ casuslıqta qabaatlavını añlamaylar.
«Olar deyler: delilik. Öyle bir şey olacağını beklemey ediler: biznes – o bir, siyaset – başqa. Ne içün bu memleket özüni öyle alıp bara ve ileride onıñnen mümkünmi… Umumen, Türkiye iş adamlarınıñ Rusiyege qarşı işançi seviyesi eksile», – dedi Mustafa Cemilev.
Qırım belediye akimiyeti yarımadanıñ şimdiki başı Sergey Aksenovnıñ Türkiye qardaş şeerleri ile işbirlikniñ toqtatılması aqqında avalesini yerine ketire. Bunı etmek zaruriyeti aqqında Aksenov dekabr 8 künü bildirdi.
Qırımda türk mahsulatını satqan tükânlar Türkye aqqında hatırlatmamaq içün levhalarını qapatmaq mecbur.
Noyabr 24 künü Türkiye-Suriye sıñırında Rusiye arbiy uçağı tüşürilgeninden soñ Rusiye-Türkiye arasında munasebetler bozulmağa başladı
