Ukraina Nazirler kabineti yanında Qırım ve Aqyar meselelerinden sabıq vekâletlisi Aslan Ömer Qırımlı AQŞda Qırımtatar Milliy Meclisi temsilciliginde işleycek, dedi Qırım.Aqiqatqa Ukraina prezidentiniñ qırımtatar halqınıñ işlerinden vekâletlisi Mustafa Cemilev.
«Bu vazife (Qırım ve Aqyar meselelerinden vekâletlisi – QA) öyle, muvaqqat edi. Baş nazirge Aslan Ömernı Amerika Qoşma Ştatlarına yollaycağımıznı bildirdik, çünki anda Meclis bölügini açamız. Elçihanemiz anda Qırım ile bağlı teşviqatnen yetiştirmey, şunıñ içün Tış işler nazirligine yardım etmek içün AQŞda temsilciligimizni açmağa qarar aldıq. O vaqıt Yatsenük oña Nazirler Kabinetinden vekâlet bermege teklif etti…Soñra bunı tek prezidentke etmege mümkün olğanı belli oldı, uyğunlaştırılmağan bir şey oldı. Bundan soñ Aslannıñ öz istegi ile vazifeden boşatılması ve vazifeniñ yoq etilmesi aqta qarar alındı. Böyle añlaştıq», – dedi Mustafa Cemilev.
O şunı da qayd etti ki, Aslan Ömer Qırımlı AQŞ Qırımtatar Milliy Meclisi temsilciliginde işine devam eter.
Qırımlınıñ işten boşatılması aqqında dekabr 1 künü belli oldı, o vaqıtta Ukraina Nazirler kabineti saytında mütenasip avale aşkâr etildi.
QMC ve Aqyar meseleleri boyunca ükümet vekâletlisiniñ vazifesi 2015 senesi yazda peyda oldı, bu vazifege bundan evel Rusiyeniñ Qırım işğalinden soñ peyda olğan Qırım meseleleri boyunca Devlet hızmetiniñ reberi Aslan Ömer Qırımlı keçti.
Qırımlı ükümet vekâletlisi vazifesinde Qırımnıñ Rusiye işğali ile bağlı halqara davalarnen oğraşmaq kerek edi. Onı temsilcilik maqsadı ile AQŞ-na yolladılar. Ukrainada Qırım meselelerinden Devlet hızmetiniñ Qırımlınıñ idaresi vaqtında işsizligi boyunca mahkeme taqiqatı ketmekte.
