Ukraina Türkiye ile Rusiye teşviqatına qarşı küreş tecribesinen paylaşmağa azır. Bu aqta Ukraina Haber siyaseti naziriniñ muavini Tatyana Popova Lvivde keçirilgen «Ukraina ve AB arasında Añlaşma Yıllığı: netice ve ilerideki adımlar» konferentsiyasında bildirdi.
«Ola bilecek işbirlik aqqında ğaye bizde bir qaç afta evelsi peyda oldı, elçihanege davet etilgenimizden soñ. Ziyaretimiz vaqtında işbirlikniñ ola bilecek bir qaç noqtasını ve Ukrainanıñ Rusiye teşviqatına qarşılıq tecribesi ile paylaşuvı imkâniyetini muzakere ettik», – dedi Popova, haber ete nazirlikniñ matbuat hızmeti.
«Bizim şimaliy qomşumız öz melez cenki usullarını ve Pridnestrovye, Nagornıy Karabahta qullanğan teşviqat aletlerini pekiştirgenini añlamaq kerekmiz, Baltiya memleketlerinde bunı yapıp olamadı, amma Gürcistan ve bıltır Ukrainanıñ bir qısmını zapt etti. Şimdi Türkiye ve Suriyege nisbeten yañı haber kampaniyaları olarnıñ toqtamağanını köstere», – qayd etti nazir muavini.
Noyabr 24 künü Türkiye-Suriye sıñırında Rusiye arbiy uçağı tüşürilgeninden soñ Rusiye-Türkiye arasında munasebetler bozulmağa başladı, Ankara tarafından Qara ve Ege deñizlerini bağlağan Çanakkale ve İstanbul boğazlarınıñ Rusiye gemileri içün qapatılması mümkün olacağı aqqında laf yürütilmege başladı. Türkiye eki boğaznı tam nezaret ete, amma gemilerniñ qatnavını halqara qanuniyet idare ete.
