Qırımtatar yaşları Türkiye aliy oquv yurtlarında tasil ala bilecek, dedi Qırım.Aqiqatqa Ukraina prezidentiniñ qırımtatar halqınıñ işlerinden vekâletlisi Mustafa Cemilev, Türkiyege iş ziyareti neticelerini izaatlap.
Aytqanı kibi, körüşüvde «qırımtatarlarnıñ alı ve Türkiyeniñ işbu vaziyette yapa bilecegi» muzakere etildi. Şu cumleden, qırımtatar studentleriniñ oquşı ile bağlı mesele köterildi.
«Şimdi Qırım territoriyasından Türkiyege oquşqa ketmege yasaq ettiler. İşte, biz o zaman balalarnı Qırım tışına, Herson vilâyeti ya da Kiyevge çıqaracaq, ve (Türkiye aliy oquv yurtlarına – QA) yollaycağımıznı qayd ettik», – dedi Mustafa Cemilev.
Qırımtatarlarnıñ yetekçileri dekabr 16-17 künleri memleketniñ birinci şahısları ile körüşmek içün Türkiye Cumhuriyetine iş ziyareti çerçivesinde kelgenler. Dekabr 16 künü Cemilev ve Çubarov Türkiye prezidenti Recep Tayip Erdoğan, baş naziri Ahmet Davuotğlu ve Tış işler naziri Mevlüt Çavuşoğlu ile körüştiler.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
