Ukrain siyasetşınası Sergey Taran dey ki, Rusiye prezidenti Vladimir Putin diger geosiyasiy yönelişler vastası, misal içün Rusiyeniñ Türkiyege nisbeten istilâsı vastası ile dünya toplulığınıñ diqqatını Qırım işğali ve Ukraina ziddiyetinden alamaz. Emindir, Ğarp Rusiyege qarşı sanktsiyalar meselesinde keri qaytmaz.
Bu aqta siyasetşınas Qırım.Aqiqat Radiosınıñ saba efirinde dekabr 18 künü bildirdi.
«Ğarpta öyle açıq ağızlar degil ki, bu Putinniñ dünya toplulığınıñ diqqatını Ukrainadaki vaqialardan almaq, sanktsiyalarnı eksiltmek, Ğarpnıñ ukrain meselesi, eñ azından Qırım aqqında unutması içün yapqan areketleri olğanını yahşı añlaylar. Menimce, mında bir şey deñişmez. Kerryniñ Moskvadaki ziyareti vaqtında da, Kerry bile işbu körüşüv vaqtında Rusiye Ukrainadan ketmegence, sanktsiyalarnıñ lâğu etilmeycegi aqqında bildirgen edi», – dey Taran.
Dekabr 9 künü Brükselde keçirilgen körüşüv vaqtında AB temsilcileri 2016 senesi yanvar ayında soñuna yetecek Moskvağa qarşı sanktsiyalarnıñ daa altı ayğa uzattırılması aqta qarar almaq kerek ediler.
Radio Svobodağa Avropa Birliginiñ memurı aytqanı kibi, Brüksel işbu sualni dekabr 21 künü al eter.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
