Rusiyede Qırımnıñ aqiqiy meselelerini muzakere etmege istemeyler, çünki prezident Vladimir Putinge yañı «ğalebeler» kerek, dep tüşüne Rusiye içtimaiyatçısı, internent içtimaiyatı boyunca ekspert İgor Eydman.
Bu aqta o 2015 senesi neticeleri boyunca Vladimir Putinniñ er yıllıq matbuat konferentsiyasını izaatlap, Qırım.Aqiqat Radiosınıñ saba efirinde bildirdi.
«Qırım teşviqat kün tertibinden kete? Ne içün kete? Çünki insanlarnı aynı şeynen aşatmağa mümkün degil. «Tsezar ğalebeleri» yañı olmalı, ve er sefer işbu ğalebeler daa da büyük olmaq kerek. Aynı şu zafer ile daima aşatmaqnıñ faydası yoq», – dedi Eydman.
Efirniñ diger musafiri – ukrain siyasetşınası Sergey Taran Qırım Rusiye kün tertibinden yerine ketirilmegen vadeler sebebinden ketkenini tüşüne.
«Putin qırımlılarğa vade etken amanlıq olmadı. Turistler kelmedi ve kelmez. İqtisadiyat inkişaf etip olamay, Qırım iqtisadiyatı, çünki daa da ciddiy seviyege çıqsa, sanktsiyalarğa oğraycaq», – qayd etti o.
Üç saatten ziyade devam etken matbuat konferentsiyasında Putin Aqyarnıñ inkişafı aqqında tarif etti. Qırım meselesi ile matbuat vastalarınıñ temsilcilerinen subetini bitirdi.
Rusiye prezidentiniñ adetiy er yıllıq matbuat konferentsiyası dekabr 17 künü üylede başlandı. Qırımda prezidentniñ matbuat konferentsiyasını mobil televezion tertibatları vastasınen kösterdiler.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
