Link açıqlığı

Saatnıñ esas haberi

10 yıl devamında çalışqan «Meydan» radiosı Qırımnı terk ete


Ukraine -- Logo Crimean Tatar radio "Meydan".
Ukraine -- Logo Crimean Tatar radio "Meydan".

«15 minut» saytı ve «Lâle» telekanalı artından Qırımda «Meydan» radiosı qapatıla. Bu aqta QHA haber agentligine radiostantsiyasınıñ baş muarriri Asan Hayretdinov bildire.

«Meydan» radiosınıñ taqımı dağıtıldı. Şimdi bazanı azırlayım ve Kiyevge berem. Andan yayınlaycaqlar. Mında «Meydan» olmaycaq», – dedi o.

Onıñ sözlerine köre, media resursınıñ qapatıluvı sebebi «15 minut» saytı ve «Lâle» telekanalı işiniñ toqtatılması ile birdir: – saibi brand aqqını bildirdi. İşine devam etmege istegen hadimlerge Kiyevge köçip kelmege teklif eteler.

«Kim istese, Kiyevge keliñiz, dediler, sizge iş bererim, amma Qırımda çalışmaycaqsıñız. Şimdi radiostantsiyasınıñ taqımından bir kimse Kiyevge azırlanmay», – qayd etti Hayretdinov.

Dünyada yekâne qırımtatar «Meydan» radiostantsiyası Roskomnadzordan iş litsentsiyasını alıp olamağanından soñ, 2015 senesi aprel 1-den, İnternetten yayınlay edi. Bu sene radio 10 yıllıq yubileyini qayd etti.

Çarşenbe künü Qırımda ATR qırımtatar telekanalı ile bir media-holdingge kirgen «15 minut» haber saytınıñ hadimleri ve «Lâle» bala telekanalı muarririyeti yarımadada işiniñ toqtatılması aqqında bildirdiler.

Aytılğanı kibi, soñ vaqıtları sayt ATR qırımtatar telekanalınıñ sabıq baş müdiri Elzara İslâmova ve onıñ sabıq muavini Lilâ Bucurova meydanğa ketirgen «QaraDeniz Production» studiyasınıñ terkibinde çalışa edi.

«15 minut» saytınıñ hadimleri «yap-yañı internet-leyhasınıñ meydanğa ketirilmesi üzerinde çalışmağa» niyetini bildirdi.

ATR media-holdinginiñ saibi Lenur İslâmov Qırım.Aqiqatqa aytqanı kibi, «15 minut» saytını qıtaiy Ukrainağa avuştırmağa ve bu maqsadı ile Qırımdan hadimlerniñ köçip kelmesini teşkil etmege planlaştıra. İslâmov şunı qayd etti ki, saytnıñ hadimlerinden bar qısmı yarımadanı terk etmege istemey.

2015 senesi aprel 1-den dünyada yekâne ATR qırımtatar telekanalı, «Lâle» bala telekanalı, «Meydan» radiosı Roskomnadzor litsenziyasını alalmayıp, işğal etilgen Qırımda yayınlavını toqtatmaq mecbur oldı. İyün 17-den ATR ve «Lâle» Kiyevden yayınlavına devam etti, «Meydan» internette çalışmağa başladı.

Dekabr 8 künü Qırımnıñ Rusiye başı Sergey Aksenov «Tatlı ses» bala istidat yarışınıñ teşkilâtçıları ve ğalipleri ile körüşüvde «Lâle» telekanalına litsenziyanı bermege vade etti.

«Lâle» telekanalınıñ saibi Lenur İslâmov oña Qırımda telekanalnıñ çalışmasına litsenziya kerek olmağanını bildirdi.

Lenur İslâmov Qrımınıñ Rusiye akimiyeti takbih etken Qırım vatandaşlıq qamaçavınıñ teşebbüsçisi ola, yerli prokuratura oña qarşı cinaiy işni açtı. Mında Lenur İslâmovnıñ mülkiyetiniñ apis etilmesi aqqında da bildirgen ediler.

XS
SM
MD
LG