Rusiye prezidenti Vladimir Putin 2014 senesi Rusiye nezareti altında olğan Qırımnıñ «bir sıra problemlerini» qayd etti.
«Qırımda qayda basmasaq, er yerde keçken asırdan qalğan problemalar çıqa», – dedi o dekabr 17 künü matbuat konferentsiyasında.
Şu cümleden, Putin yarımadada energetik meselesini qayd etti. «Biz şimdi elektrik energiyası ile bağlı mesele ile oğraşamız. «Krımenergo» donatuvı keçken asırnıñ 50-nci senelerinden yañartılmağan. Sanki bunı etmege zaruriyet yoq edi», – dedi Putin ve Aqyarda bahriye bazasınıñ vaziyeti de aynı olğanını bildirdi.
Üç saatten ziyade devam etken matbuat konferentsiyasında Putin Aqyarnıñ inkişafı aqqında tarif etti. Qırım meselesi ile matbuat vastalarınıñ temsilcilerinen subetini bitirdi.
Rusiye prezidentiniñ adetiy er yıllıq matbuat konferentsiyası dekabr 17 künü üylede başlandı. Qırımda prezidentniñ matbuat konferentsiyasını mobil televezion tertibatları vastasınen kösterdiler.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
