Moskvada devlet kâtibi John Kerryniñ Rusiye Minsk añlaşmalarını yerine ketirse, AQŞ tarafından oña qarşı sanktsiyalarnıñ lâğu etilecegi aqqında bildirüvi Rusiyeniñ işğali altında olğan Qırım meselesi kün tertibinden alınacağını nazarda tutmay.
Bu aqta dekabr 16 künü AQŞ Devlet departamentiniñ matbuat kâtibi John Kirby bildirdi.
«Qırım işğalini alâ daa tanımaymız ve bu episi bir müim sual olıp qalmaqtadır», – dedi o.
John Kerry Rusiye yolbaşçılığı – prezident Vladimir Putin ve Rusiye Tış işler naziri Sergey Lavrov ile körüşüvden soñ Minsk añlaşmaları yerine ketirilmese, sanktsiyalarnıñ lâğu etilmesi aqqında söz bile ketmeycegini qayd etti.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
