2016 senesi Qırımda sürgün etilgenlerniñ abadanlaştıruvına ayırılğan üçte bir qısmı «Cemaat qırımtatar teleradiokompaniyasına» ayıracaqlar. Bu aqta Qırım Devlet şurasınıñ matbuat hızmeti bildirdi.
«Cumhuriyet bücetinde 2016 senesi «Cemaat qırımtatar teleradiokompaniyası»nıñ faaliyeti teminlevine ve donatuvnıñ satın aluvına 116,1 mln ruble, 27,9 mln ruble – «Dostluq evi»ne, Devlet komitetine ait olğan diger müessiselerniñ ihtiyaclarına ve medeniy tedbirlerniñ keçirilmesine ayırılacaq»,– denile beyanatta.
Umumen Qırımnıñ Rusiye ükümetiniñ maliye nazirliginiñ malümatına köre, 2016 senesi Qırım Cumhuriyeti milletlerara munasebetler ve sürgün olunğan grajdanlarnıñ işleri boyunca Devlet komitetine 428,5 mln ruble ayırılacaq.
Bildirilgeni kibi, «Cemaat qırımtatar teleradiokompaniyası» 2015 senesi iyün 10 künü Qırımnıñ rusiyeli ükümetiniñ avalesi boyunca teşkil etildi. Telekanalnıñ tesisçisi – Qırım Cumhuriyeti milletlerara munasebetler ve sürgün olunğan grajdanlarnıñ işleri boyunca Devlet komitetidir.
2015 senesi aprel 1-den dünyada yekâne ATR qırımtatar telekanalı, «Lâle» bala telekanalı, «Meydan» radiosı Roskomnadzor litsenziyasını alalmayıp, işğal etilgen Qırımda yayınlavını toqtatmaq mecbur oldı. İyün 17-den ATR ve «Lâle» Kiyevden yayınlavına devam etti, «Meydan» internette çalışmağa başladı.
Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.
