Ukraina Tasil ve ilim nazirligi (MON) Geniçesk rayon memuriyeti (Herson vilâyeti) reisiniñ muavini Gülnara Bekirovağa rayon mektepleri içün qırımtatar tilinde dersliklerni berdi.
Bu aqta Qırım.Aqiqatqa MON Tasil mündericesi institutınıñ til ögrenüv bölüginiñ hadimi Svetlana Fomina bildirdi.
«Herson tasil idaresi İçtimaiy siyaset nazirligine qırımtatar tilinde derslikler ile yardım etmege muracaat etti, arizanıñ kоpyası bizge tüşti. Böyle imkânnı taptıq, dersliklerni ayırdılar – em asıl, em tercime etilgen», – dey Fomina.
Onıñ sözlerine köre, 39 biñ grivnalıq 328 derslik, qullanma, luğat ve bediiy edebiyat kitapları dekabr 16 künü Geniçesk rayonınıñ mekteplerine berildi. Fomina aytqanı kibi, derslikler Qırım işğalinden evel «Krımuçpedgiz» basmahanesinde neşir etildi. Olarnıñ arasında – qırımtatar tili ve qırımtatar ve dünya edebiyatı, ukrain tilinden tercime etilgen fen derslikleri.
Gülnara Bekirovanıñ aytqanına binayen, Geniçesk rayonı mekteplerinde til kurslarınıñ açılması ile qırımtatar tilinde dersliklerniñ zaruriyeti arta.
«Sçastlivtsevo, Strelkovoye ve Partizanı mekteplerinde, ve ekinci mektepte (Geniçesk rayonı Novoalekseyevkanıñ №2 umumtasil mektebi – QA) ana tilini qoşma dersler şeklinde ögreneler», – dedi Bekirova.
Aytqanı kibi, Geniçesk rayonına dersliklerni ketirmek içün naqliyatnı ATR qırımtatar telekanalı berdi.
Herson vilâyetiniñ Geniçesk rayonı – Qırım tışında qırımtatarlarnıñ toplu yaşağan rayonıdır (ealiniñ bir 13%). Novoalekseyevkanıñ №1 umumtasil mektebi – qıtada qırımtatar tiliniñ 1 – 11 sınıflarında ögretilmesi ile yekâne mekteptir.
