Link açıqlığı

Celâl: Keriçte ğayıp olğan qırımtatarlarnı politsiya qıdıra


Keriçte ğayıp olğan qırımtatarlarnıñ qıdıruvına uquq qoruyıcı organlarnıñ hadimleri qoşuldı. Bu aqta Qırım.Aqiqatqa Qırımtatar Milliy Meclisi reisiniñ birinci muavini Nariman Celâl bildirdi.

Aytqanı kibi, tünevin ğayıр olğan Ruslan Ganiyev ve Arlen Terehov alâ daa tapılmağanlar. Mütenasip ariza politsiyağa yazılğan endi, Ruslan Ganiyevniñ evinde endi yerli uquq qoruyıcılar bulundılar.

«Cinaiy qıdıruvdan keldiler, sanki yardım etecek şahsiy şeylerni aldılar… FSB, bilgenimizge köre, haberdar. Malümatımızğa binayen, esas fikir – dindar musulman olıp, bu adamlarnıñ göñülli sürette Suriyege ketmesi mümkün, yani, kimse olarnı esir almadı, özleri kettiler», – dey o.

Nariman Celâl şunı qayd etti ki, evelleri Qırım musulmanlarınıñ Yaqın Şarqqa ketmesi ile bağlı vaqialar olsa bile, 2014 senesi sentâbr ayında belgisiz şahıslar eki qırımtatarını maşinağa itep, hırsızlığan ediler, onıñ içün neticelerniñ çıqaruvında aşıqmamağa çağırdı.

«Bu insanlarnıñ kim olğanını, ne tüşüngeni ve aytqanını ögrenmege tırışamız. Olarnen tanış olğan insanlar aytqanı kibi, bir yerge barmağa istekleri sanki yoq edi», – dedi Celâl.

Qırım uquq qoruyıcı organlarından bu aqta resmiy bildirüvleri yoq.

Qırımtatar Milliy Meclisi reisiniñ birinci muavini Nariman Celâl Keriç regional meclisniñ reisine esaslanıp, dekabr 15 künü Keriçte eki insannıñ ğayıp oluvı aqqında bildirgen edi – Ruslan Ganiyev ve dostu Arlen Terehov.

Qırımda insanlarnıñ ğayıp oluvı ile bağlı ilk vaqia degildir. 2014 senesinden, Rusiye Qırımnı işğal etkeninden soñ, yarımadada insanlar, şu cümleden qırımtatarlar ğayıp olmağa başladı. Bu aqta halqara uquq qoruyıcılar, Qırımtatar Milliy Meclisiniñ yolbaşçılığı bildire edi. Ukraina Milliy havfsızlıq ve mudafaa şurasından yarımadada 21 yaşında qırımtatarnıñ ğayıp oluvı aqqında bildirgen ediler. Qırımda işbu vaqialarnıñ taqiqatı neticesizdir.

Qırımda İnsan aqları boyunca Rusiye vekâletlisi Lüdmila Lubina qırımtatarlarnıñ ğayıp oluvı aqta malümatnı tenqit ete ve aqiqatqa uymağanını bildire edi.

XS
SM
MD
LG