Qırımda ATR qırımtatar telekanalı ile bir media-holdingge kirgen «15 minut» haber saytınıñ hadimleri yarımadada işiniñ toqtatılması aqqında bildireler. Bu aqta dekabr 16-da, çarşenbe künü, aşkâr etilgen beyanatta söz kete.
Aytılğanı kibi, soñ vaqıtları sayt ATR qırımtatar telekanalınıñ sabıq baş müdiri Elzara İslâmova ve onıñ sabıq muavini Lilâ Bucurova meydanğa ketirgen «QaraDeniz Production» studiyasınıñ terkibinde çalışa edi.
«15 minut» saytınıñ hadimleri «yap-yañı internet-leyhasınıñ meydanğa ketirilmesi üzerinde çalışmağa» niyetini bildirdi.
ATR media-holdinginiñ saibi Lenur İslâmov Qırım.Aqiqatqa aytqanı kibi, «15 minut» saytını qıtaiy Ukrainağa avuştırmağa ve bu maqsadı ile Qırımdan hadimlerniñ köçip kelmesini teşkil etmege planlaştıra. İslâmov şunı qayd etti ki, saytnıñ hadimlerinden bar qısmı yarımadanı terk etmege istemey.
«Menimce, sayt köçip kelmek kerek, çünki men mında keldim ve elimde olğan aktivlerni idare etmek kerekim. Qırımda qalmağa istegen ve öz işine devam etmege çaresini körgen jurnalistler anda qalır. Bunı yapıp olamaycağını tüşüngenlerni Kiyevge alırmız. Anda (Qırımda – QA) serbest jurnalistika endi yoq. Jurnalistika anda basqı altında. Maña ait olğan aktivlerniñ serbest olmasını isteyim, jurnalistler fikirlerini serbest bildirmeli, olarnı nasıl ibareler astında saqlamasını uydurmamalı», – dey İslâmov.
O şunı da qayd etti ki, qıtaiy Ukrainağa köçecek jurnalistler «15 minut» saytında çalışmağa devam eter.
2015 senesi aprel 1-den dünyada yekâne ATR qırımtatar telekanalı, «Lâle» bala telekanalı, «Meydan» radiosı Roskomnadzor litsenziyasını alalmayıp, işğal etilgen Qırımda yayınlavını toqtatmaq mecbur oldı. İyün 17-den ATR ve «Lâle» Kiyevden yayınlavına devam etti, «Meydan» internette çalışmağa başladı.
