Link açıqlığı

Ukraina ükümeti Rusiye tarafından işğal etilgen Qırımğa mal ve hızmetlerniñ ketirilmesini yasaqlağan qararnı qabul etti, dep bildire Ukraina baş naziri Arseniy Yatsenük dekabr 16-da.

Bu aqta Nazirler kabinetiniñ matbuat hızmeti bildire.

«Ukraina ükümetiniñ qarırna binayen bütün gümrük rejimleri boyunca vaqtınca işğal etilgen territoriyadan Ukrainanıñ diger territoriyasına ve/ya da Ukrainanıñ diger territoriyasından Ukrainanıñ vaqtınca işğal etilgen territoriyasına iş, mal ve hızmetlerniñ berilmesi yasaq etile», – denile beyanatta.

Qayd etilgeni kibi, istisnalar cedveline vatandaşlarnıñ şahsiy şeyleri, içtimaiy emiyeti olğan aşayt malları ve gumanitar yardım kire.

Yatsenük şunı qayd etti ki, Ukraina Nazirler Kabinetiniñ mütenasip qararı, Qırımnıñ iqtisadiy zonası aqqında qanunına köre, qabul etilgeninden soñ 30 kün devamında işlep başlar.

«Bugün ükümet bu qararnı qabul eter, 30 künden soñ çalışıp başlar», – dedi o.

Sentâbr 20 künü Qırımğa aşayt malları ile qatnağan yük maşinalarınıñ qamaçavı boyunca Qırımtatar Milliy Meclisiniñ aktsiyası başlandı. Qamaçav iştirakçileriniñ talapları arasında – siyasiy mabüslerniñ azat etilmesi, Qırımda insan aqlarına riayet etüv ve yarımadağa halqara eyyetlerniñ kirsetilmesi.

Qırım Rusiye tarafından işğal etildi. Ukraina Yuqarı Radası Rusiyeniñ vaqtınca Qırım işğaliniñ resmiy başlanğıçı olaraq 2014 senesi fevral 20 kününi ilân etti. 2015 senesi oktâbr 7-de Ukraina prezidenti Petro Poroşenko bunıñnen bağlı qanunnı imzaladı. Ğarp memleketleri bir sıra iqtisadiy sanktsiyalarnı kirsetti. Rusiye yarımada işğalini inkâr etip, onı «tarihiy adaletniñ tiklenmesi» dep adlay.

XS
SM
MD
LG