Nobel barışıq mukâfatınıñ namzeti, pakistanlı Malala Yusufzay dey ki, siyasetçiler musulmanlarnı tenqit etip, yañı ekstremist ücümlerni rağbetlendireler.
Bu aqta o dekabr 15 künü İngliterede yıl evelsi Pakistanda talibanlarnıñ ücümi neticesinde elâk olğan balalarnıñ ruhuna keçirilgen dua tedbirinden soñ çıqışta bulunıp ayttı.
«Aqiqaten nefret, digerlerge qarşı ayırım mefküresine tolu izaatlarnı eşitkeniñiz facialıdır», – dedi Yusufzay, 2016 senesi Cumhuriyet firqasından AQŞ prezidenti vazifesine namzet olmağa istegen milliarder Donald Trumpnıñ aytqanını tenqit etip.
«Musulmanlarğa ne qadar çoq qarşı laf aytsaq, o qadar da çoq terroristni meydanğa ketiremiz», – dedi Nobel mukâfatınıñ namzeti Birmingham şeerinde Channel 4 News telekanalına.
Donald Trump dekabr başında musulmanlar içün AQŞ kirişini yasaqlamağa teklif etti – San Bernardino (California) şeerinde olğan kütleviy öldürüv sebebinden, şu ücüm içün mesuliyetni özüne «İslâm devleti» teşkilâtı aldı.
18 yaşında uquq qoruyıcı Yusufzay Pakistanda oña qarşı talibanlar tarafından etilgen ücümden soñ belli oldı. Qız başına atılğan atıştan soñ sağ qaldı ve balalarnıñ, hususan qızlarnıñ tasil aqqı oğrunda küreşmege devam ete.
2014 senesi onı Nobel barışıq mukâfatı ile taqdirlediler.
