Link açıqlığı

Energetik strategiyalar institutınıñ eksperti Yuriy Korolçuk dey ki, şimdi Rusiye tarafından işğal etilgen Qırım qıtaiy Ukrainadan berilgen elektrik energiyasından vazgeçmeycek. Fikrine köre, kelecekte Qırım ukrain energetik tertibatına bağlı olacaq, amma başqa şartlarda.

Bu aqta dekabr 16 künü Qırım.Aqiqat Radiosınıñ efirinde bildirdi.

Korolçuk dey ki, «Kahovka – Titan» yolağı daa eki yıl devamında yarımadanı temin etecektir, amma Rusiyeden energetik köpür tam quveti ile işlettirilse, bu yolaq yalıñız ceryan keçirici olaraq çalışacaq.

«O episi bir çalışacaq, ve biz Qırım yarımadası ile bağlı olacaqmız. Episi bir anda elektrik energiyasını berecekmiz, amma bu endi ceryan keçirüvi kibi resmiyleştirilecek. Onı anda satmaycaqmız», – dedi o.

Aytqanı kibi, şimdi Ukraina böyle şartlarda Poloniya ve Rusiye ile çalışa.

Salı künü, dekabr 15-de, Rusiye prezidenti Vladimir Putin Kremlden Qırımğa Krasnodar diyarından energetik köpürniñ ekinci yolağınıñ berilmesi aqqında bildirdi, o yarımadağa qoşma 220 MVt energiyasını berecektir.

Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene. Amma bu yeterli degil. Qırımğa dekabr 2 künü kelgen Rusiye prezidenti Vladimir Putin Kubanden Qırımğa energetik köpürniñ birinci yolağınıñ berilmesi tedbirinde iştirak etti.

Dekabr 8 künü Ukraina energetik tertibatından Qırımğa bir elektrik yolağı boyunca elektrikniñ berilmesi ğayrıdan tiklendi. Amma Qırımda alâ daa ağ qazaları yüz bere.

XS
SM
MD
LG