Transformator stantsiyalarında yüz bergen qaza sebebinden Yaltanıñ eki soqağında yerleşken evler ışıqsız qaldı, dep bildirile Qırımnıñ Rusiye ükümeti saytında.
Yalta RES malümatına köre, qaza ekinci transformator stantsiyasında yüz berdi («Cenübiy yalı»), ışıqsız Voykova, 40 ve Şçerbaka, 32 soqaqlarındaki evler qaldı.
«Bozulğan kabel yolaqlarınıñ tamiri ile bağlı tedbirler keçirile», – denile beyanatta.
Salı künü, dekabr 15-de, Rusiye prezidenti Vladimir Putin Kremlden Qırımğa Krasnodar diyarından energetik köpürniñ ekinci yolağınıñ berilmesi aqqında bildirdi, o yarımadağa qoşma 220 MVt energiyasını berecektir.
Qırımda noyabr 22 künü saat 00:25 yarımadağa Ukraina qıtasından kelgen elektrik energiyası söndürildi. Yarımada şimdi Qırımnıñ elektrik energiyası, em de 2014 senesi Rusiyeden ketirilgen dizel generatorlar sayesinde teminlene. Amma bu yeterli degil. Qırımğa dekabr 2 künü kelgen Rusiye prezidenti Vladimir Putin Kubanden Qırımğa energetik köpürniñ birinci yolağınıñ berilmesi tedbirinde iştirak etti.
Dekabr 8 künü Ukraina energetik tertibatından Qırımğa bir elektrik yolağı boyunca elektrikniñ berilmesi ğayrıdan tiklendi. Amma Qırımda alâ daa ağ qazaları yüz bere.
